سفیر امریکا در تاجیکستان گفته است که ایالات متحده از مخالفان مسلح طالبان حمایت نمی‌کند.
مانوئل میکالر در مصاحبه با رسانه آسیاپلاس تاجیکستان گفت که امریکا از همه طرف‌ها می‌خواهد خویشتن‌داری کنند و وارد گفت‌وگو شوند.
به گفته وی، این تنها راهی است که افغانستان قادر خواهد بود مشکلات خود را به شیوه‌ای پایدار حل کند.
سفیر امریکا در پاسخ به این سوال که «چرا ایالات متحده آشکارا از جبهه مقاومت ملی افغانستان به رهبری احمد مسعود، تنها نیروی مقاومت علیه طالبان که مانند ایالات متحده، تاجیکستان و بیشتر کشورهای جهان می‌خواهد در افغانستان دولتی ایجاد شود که حقوق بشر در آن رعایت می‌شود، حمایت نمی‌کند؟» پاسخ داد: ایالات متحده از مخالفان مسلح در افغانستان حمایت نمی‌کند.
متن این مصاحبه روز جمعه ۱۲ جوزا در وبسایت رسانه آسیاپلاس تاجیکستان منتشر شده است.
سفیر امریکا در تاجیکستان در عین حال گفته که واشنگتن از اگست ۲۰۲۱ تاکنون بیش از۱.۱ میلیارد دالر کمک بشردوستانه به افغانستان کرده است.
مانوئل میکالر گفت ایالات متحده نگرانی‌های تاجیکستان در مورد تهدیدات امنیتی ناشی از افغانستان را هم درک می‌کند و کشورش بیش از ۶۰ میلیون دالر برای تقویت مرزها و مبارزه با تروریسم به دوشنبه اختصاص داده است.
