با اینکه بیش از یک هفته به پایان مهلت دولت پاکستان برای اخراج مهاجران افغان از این کشور باقی مانده است، مقام‌های آن می‌گویند که هزاران مهاجر را از این کشور اخراج کرده است.
رادیو دولتی پاکستان یکشنبه، ۲۲ اکتبر، به نقل از مقام‌های وزارت داخله گزارش داد که در کمتر از یک ماه، نزدیک به ۶۰ هزار مهاجر افغان از پاکستان اخراج شده‌اند.
به گزارش وبسایت اقتصادی «بیزینس ریکوردر» در پاکستان، رادیو دولتی این کشور گفته است که پس از اعلام مهلت یک‌ماهه برای مهاجران غیرقانونی افغان برای خروج از پاکستان، پلیس این کشور ۵۹ هزار و ۵۶۱ پناهجوی افغان را اخراج کرده است. همچنین، به ارتش، نیروهای انتظامی، پرسنل پلیس راهنمایی و رانندگی و حتی اداره‌های دولتی پاکستان هم دستور داده شده است که برای اخراج بیشتر مهاجران غیرقانونی افغان همکاری کنند.
گزارش‌های منتشرشده حاکی است که پلیس پاکستان شبانه به خانه‌های پناهجویان افغان هجوم می‌برد و همه اعضای خانواده‌ها را به اردوگاه‌ها و از آنجا به سوی مرز‌ها انتقال می‌دهند تا اخراج شوند. همچنین، به دستور وزارت کشور پاکستان، اموال پناهجویان اخراج‌شده مصادره می‌شود. در حال حاضر بیشترین هجوم پلیس برای اخراج مهاجران غیرقانونی افغان، در شهر کراچی گزارش شده است.
دولت پاکستان دلیل اخراج جمعی پناهجویان افغان را تامین امنیت و ثبات در این کشور اعلام کرده است. وزارت داخله پاکستان پیش از این گفته بود که افغان‌ها در حمله‌های تروریستی علیه مراکز دولتی در پاکستان دست دارند.
