خبرگزاری تاس روسیه صبح روز دوشنبه، اول نومبر، خبر داد که احمد مسعود، رهبر جبهه مقاومت ملی افغانستان، در تاجیکستان است و برای دیدار با واحدهای نظامی جبهه مقاومت، به افغانستان سفر می‌کند.
خبرگزاری تاس به نقل از کبیر واثق، معاون پیشین والی پنجشیر، نوشته است که مسعود در تلاش است کشورهای منطقه و جامعه جهانی را برای مبارزه با طالبان متقاعد کند و برای این کار قصد دارد به کشورهای مختلف سفر کند. کبیر واثق به خبرگزاری تاس گفته است که جبهه مقاومت ملی افغانستان با دولت تاجیکستان روابط خوبی دارد و این کشور تاکنون از این جبهه به‌خوبی حمایت کرده است.
پس از آنکه در پی تهاجم و لشکرکشی طالبان، مرکز ولایت پنجشیر از کنترل نیروهای جبهه مقاومت ملی خارج شد، سران این جبهه از جمله احمد مسعود و امرالله صالح، در مناطقی نامعلوم پناه گرفتند. آن‌ها تاکنون نگفته‌اند کجا حضور دارند اما قبل از این هم شماری از منابع نزدیک به جبهه مقاومت ملی گفته بودند که رهبران جبهه مقاومت ملی در تاجیکستان‌اند.
دولت طالبان در تاریخ هفتم سپتمبر کابینه خود به ریاست ملا محمد حسن آخوند را اعلام کرد که با واکنش کشورهای مختلف جهان مواجه شد. امامعلی رحمان، رئیس‌جمهور تاجیکستان، یکی از رهبرانی بود که کابینه طالبان را غیر قابل قبول و انحصاری خواند. امامعلی رحمان در چند نشست بین‌المللی از جمله در هفتادوششمین نشست مجمع عمومی سازمان ملل، برگزاری انتخابات و تشکیل یک حکومت فراگیر با حضور نمایندگان همه اقوام ساکن در افغانستان را خواستار شد.
رئیس‌جمهور تاجیکستان در سازمان ملل گفت که اوضاع افغانستان به عنوان همسایه تاجیکستان، بر این کشور تاثیرگذار است و بدون تشکیل یک حکومت فراگیر و مورد قبول همه اقوام افغانستان، ثبات در آن کشور تامین نمی‌شود. به دنبال این سخنان رئیس‌جمهور تاجیکستان، ملابرادر، معاون نخست‌وزیر طالبان، حکومت تاجیکستان را به مداخله در امور داخلی افغانستان متهم کرد و در پی آن، گزارش‌هایی از مستقر شدن گردان‌های انتحاری طالبان و تروریست‌های جماعت انصارالله کنار مرزهای افغانستان با تاجیکستان منتشر شد.
از میان کشورهای آسیای میانه، تاکنون نمایندگان کشورهای ازبکستان، ترکمنستان و قزاقستان برای ملاقات با سران طالبان به کابل سفر کرده‌اند، اما تاجیکستان ضمن اینکه هیچ تماسی با طالبان برقرار نکرده، دولت این گروه را بارها غیرقابل قبول اعلام کرده است.
ایندپندنت
۲۰۲۱/۲/۱۱
