ه‌دنبال افزایش نگرانی‌ها نسبت به تهدید تروریسم از خاک افغانستان امام‌علی رحمان، رییس جمهور تاجیکستان، بار دیگر به نفوذ گروه‌های تروریستی به قلمرو کشورهای آسیای مرکزی اشاره کرده است.
آسیا پلس گزارش داده که رحمان روز پنج‌شنبه، ۲۳ سنبله، در پنجمین نشست مشورتی سران کشورهای آسیای مرکزی گفته که نیروهای این کشور چندی پیش از دو تلاش تروریستی برای ورود به خاک تاجیکستان جلوگیری کرده‌اند.
به گفته وی، آنان [اعضای گروه انصارالله] قصد انجام حملات تروریستی به دوشنبه، پایتخت تاجیکستان و سایر نقاط این کشور را داشته‌اند.
رییس جمهور این کشور افزوده است: «در عین حال، ما افزایش فعالیت گروه‌های تروریستی مختلف را در خاک افغانستان احساس می‌کنیم. در سال‌های اخیر، ما با تلاش‌های گروه‌های تروریستی مختلف برای نفوذ و عبور غیرقانونی از مرزهای دولتی مواجه بوده‌ایم.»
وی همچنین با بیان این که سال گذشته حدود پنج تن مواد مخدر از مرز با افغانستان کشف و ضبط شده، خاطرنشان کرده است که حجم قاچاق مواد مخدر نیز در حال افزایش است.
با این حال، رحمان تاکید کرده است که در چنین شرایط، کشورهای منطقه باید با هم و متحد همکاری کنند و امنیت را در اولویت قرار دهند.
این اظهارات در حالی مطرح می‌شود که هفته گذشته در نتیجه درگیری نیروی‌های مرزی تاجیکستان و گروه انصارالله در نقاط مرزی سه عضو این گروه کشته شدند.
اعضای این گروه قصد ورود از درواز بدخشان به خاک تاجیکستان را داشتند. رویدادی که طالبان در افغانستان در پیوند به آن اظهارنظری نکردند.
