حاجا لحبیب، وزیر خارجه بلجیم، گفته است که در دیدار با سرپرست وزارت خارجه اوزبیکستان در مورد اوضاع افغانستان به‌ویژه اوضاع زنان و دختران افغان، گفت‌وگو کرده‌اند.
حاجا لحبیب ناوقت روز یک‌شنبه، ۳ ثور، با نشر توییتی از دیدارش با بختیار سعیداف، سرپرست وزارت خارجه اوزبیکستان، خبر داده است.
او افزوده است که در این دیدار اوضاع افغانستان به‌ویژه اوضاع زنان و دختران در این کشور و جنگ اوکراین، بخشی از گفت‌وگو میان او و بختیار سعیداف بوده است.
خانم لحبیب تصریح کرده است که با سرپرست وزارت خارجه اوزبیکستان در پیوند به مسایل حقوق بشری و همکاری‌های دوجانبه میان بلجیم و اوزبیکستان نیز گفت‌وگو کرده است.
گفتنی است که پس از تسلط گروه طالبان بر افغانستان، اوزبیکستان از جمله کشورهایی بوده که با این گروه روابط نزدیک برقرار کرده است.
