وزارت تحصیلات عالی طالبان می‌گوید که سفیر اوزبیکستان در کابل از ندامحمد ندیم، سرپرست این وزارت دعوت کرده است تا به تاشکند سفر کند.
وزارت تحصیلات عالی طالبان روز سه‌شنبه، ۲۶ سرطان، با نشر خبرنامه‌ای در برگه ایکس از دیدار ندیم با خواجه یادگار شادمانوف، سفیر اوزبیکستان در کابل خبر داده است.
این وزارت افزوده است که دو طرف در این دیدار در مورد گسترش روابط اکادمیک گفت‌وگو کرده‌اند.
به گفته ندیم، اوزبیکستان از جمله کشورهایی است که در بخش‌های مختلف، به‌ویژه تحصیلات عالی «صادقانه و مخلصانه» با افغانستان همکار می‌کند.
وی تصریح کرده است که طالبان تمام امورات داخلی و خارجی خویش را خودشان پیش می‌برند.
از جانبی، وزارت تحصیلات عالی طالبان به نقل از یادگار شادمانوف نوشته‌اند که وی از ندیم برای سفر به اوزبیکستان دعوت کرده است.
